سعر و مواصفات Samsung Galaxy S4 I9500

بعد اذنكو يا جماعه الاس 4 عامل دلوقت ف السعوديه 1750 ريال ممكن سعرة ينزل قد ايه بعد نزول الاس 5 ؟؟

ياجمماعة واحد صاحبى جايب جالاكسى يونج وكتبنا على موقع imei الرقم بتاعه وطلع موبايل تانى خالص أرجو الرد بسرعة

أى النسختين أفضل i9500أو i9505

الموبيل دة مستعمل بضمان عامل كام يكون حالة ممتازة جدا

ا سامح انا جبت s4 وهو ع نسخة 4.2.2 ولما دخلت واي فاي جت رساله ان ده اخر تحديث ممكن اعرف ليه متحدثش ولك جزيل الشكر

السلام عليكم أستاذ سمسم تقيم كويس جدا للموبيل بس حضرتك قولتلى انى مع اصدار 4.3 اتحلت مشكلة السخونة طب انا باذن الله لما اشترى الموبيل هيبقى اصدار ايه ليه بيبقى نزل معاه لانى حكاية السخونة مخوفنى وفى ناس اعرفهم كانو جايبن الموبيل ورجعو تانى بسب ده انا عايزة اعرف بس هو هينزل بان اصدار ولازم استنى الاصدار4.3 لغيت لما ينزلى ولا لا لان اهم حاجة الجهاز ميكونش بيسخن والبطارية وعايزة اعرف بردك الموبيل مع حضرتك من اقد ايه وشكرا ياريت تفيدنى لان كنت هشترى النوت 2 لما حضرتك قولتلى انو الاس فور أحسن النسخة 19500 احسن اقولت هشوف احسن فى ايه لو كده هشترى وشكرا ياريت تفيدنى .

قبل مابدأ كلامى فى تقييم الهاتف الرائع S4 9500 احب اقول حاجة عشان بس الناس تبقى عارفة انها ماتسمعش لاى كلام وخلاص , لازم تاخد الكلام من ملاك الهاتف

ونبدأ التقييم ونقول " بسم الله الرحمن الرحيم "

1- الشكل : شكل ال S4 رائع وشيك جداااااااااا وخصوصا اللون الابيض بالاطار المعدنى بيديلة شكل رائع الصراحة + ازرارا تعلية الصوت والباور المعدنية بالكامل يعنى معناة انها هتفضل كدة مش هتتغير
وعندك زرار الهوم حوالية اطار من الكرووم بشكل رائع جذاب تحس معاة بالاناقة والشياكة

( 8.5/10 )

2- الخامات : الظهر الخلفى مصنوع من مادة البولى كربونيت , لها ملمس ناعم جدااا , وشكل لامع بيديك احساس انة زجاجى مش بلاستيك , وكمان مرن جداا عنى مش سهل يتسكر وبردة صعب يتخدش الا لو بألة حادة ( 8/10 )

3- الشاشة : شاشة رائعة والوانها روعة بمعنى الكلمة , الى الان ماشوفتش شاشة افضل منها فى الالوان , والتاتش بتاعها رائع بمعنى الكلمة وكمان السطوع بتاع عالى يعنى ماشاء الله قوية الوان واضاءة ( 10/10 )

4- الاداء : يتميز الهاتف بسرعة عالية جدااااااااااااا , يعنى تقريبا شغلت اقوى العاب , وعملت اقوى شغل على الهاتف , والحمد لله الهاتف استجاب بكل مرونة وسلاسة بدون تقصير والحمد لله نسبة التهنيج ( صفر ) وتم عمل اختبار لل ANTUTN BENCHMARK والهاتف سجل 28560 الف بتحديث ال 4.3 , وتم اللعب على الجهاز العاب عالية جداا وقوية جدا فى الجرافيك بتاعها والحمد لله الهاتف حاجة تانية خالص فى الالعاب , تحس انك بتلعبها 3D و بتفاصيل مش موجودة غير على الكمبيوتر
الذى تم تجربتة على الهاتف (REAL RACING 3 - ASPHALT 8 - NFS MW - MOERN COMPACT - FIFA 2014 - SUPWAY SURFER )
(9/10 )

5- الرامات : الجهاز يأتى بأجمالى رامات 2 جيجا , الصافى للمستخدم 1.82 جيجا المستهلك بقى كام 980 ميجا بدون عمل CLEAR RAM وبعد عمل CLEAR RAM بتوصل ل 850 ميجا , ومع فتح البرامج او النت مش بتزيد عن 1 جيجا 300 بالكتير اوى
( 10/10 ) والتقييم دة عشان حاجة واحدة , عمرى مااحتجت اعمل CLEAR RAM وتقريبا مابقيتش بدخل عليها اصلا الا كل فترة للتأكد من سير النظام بصورة سليمة

6- الاوبشن والسينسورز : كل اللى اقدر اقولة ان التليفون دة فية كل حاجة انت محتاجها , انا عن نفسى مابقيتش محتاج انزل برامج او اى حاجة التليفون فية كل حاجة مهما كانت , وكل الحساسات اللى فية بتعمل بشكل مثالى , والصراحة فعلا جهاز متكامل يقدر يشغلك كل حاجة ويقضيلك مهامك بكل سهولة ويسر
( 10/10 )

7- الاصوات : 1- صوت سماعة التحدث : كل اللى هقدر اقولة انها عالية جدااا , نقية جداااااااااااا , وفية اوبشن فيها تخليك تختار ال EQUALIZER بتاعها او تفعل المايك التانى بتاع ال NOISE CANCELLATION واللى فعلا فعلا بيعزل تماما الصوت عندك ومش بيكون واضح غير صوتك انت بس , واى حد بيكلمنى وانا فى الشارع بيفتكر انى فى البيت او فى مكان مغلق
( اديها 10/10 )
2- صوت السماعات الخارجية : الصوت قوى وعالى من مشغل الموسيقى تحس كدة انك بتسمع الحاجة بجمال صوت ونقاء وصوت عالى وواضح , لكن لما بتعمل الاغنية كرنة تنبية , بيكون الصوت منخفض شوية عن مانت بتسمع الاغنية من مشغل الموسيقى , بس بيبقى مسموع وواضح فى اى مكان عادى جداااااااااا ( 9/10 )
3- صوت سماعات الاذن : كل اللى هقدر اقولة حاجة , ماسمعتش صوت فى حياتى بقوة السماعات دية ولا ال OUTPUT بتاع التليفون دة ماشاء الله علية روعة وصوت رائع وجربتة كمان على سماعات عربيتى 6 سماعات ماشاء الله علية ادانى فرق صوت تانى عن الادفانس اللى معايا لانى جربت الاتنين للتجربة ( 10/10 )

8- الكاميرا : اوبشن كتييييييييييير جدااا ورائع , وكاميرا اكثر من ممتازة وضوح واضاءة وسرعة التقاط رهيبة , وتصوير ال HDR فظيع , بيديك قوة الوان ووضح عالى جدااا للصورة
فلاش التليفون قوى جدااا , ولما بيصور وانت بتلقط الصورة كأنك بتستخدم كاميرا احترافية عالية الجودة , وكمان ميزة مهمة جداا وهية ال NIGHT MODE , وفعلا بتديك اضاءة ووضوح عالى جداا كأنك فى النهار وبتفاصيل ممتازة ( 9/10)

9- البطارية : تم استخدام الهاتف فى جميع الظروف معادا فقط الاستخدام الخفيف عشان مش هينفع معايا فكانت النتيجة كالاتى :

1- فى الاستخدام المتوسط : الهاتف عمل يومين و19 ساعة وكانت نسبة الاستخدام ( مكالمات لمدة 3 ساعات وشوية - نت لمدة نصف ساعة - العاب لمدة نص ساعة - تشغيل اغانى لفترة 15 ساعة - تصوير كاميرا لمدة نص ساعة واكتر كمان ) وكل دة والحمد لله باقى فى البطارية 30%

2- فى الاستخدام القوى : الهاتف قعد معايا يوم و20 ساعة وكان الاستخدام كالاتى :
( مكالمات لمدة 5 ساعات ونص - نت لمدة ثلاث ساعات متقطعين - لعب لمدة ساعة - شغل على الهاتف مابين فتح الاستوديو وتشغيل فيديوهات وتصوير ومشاهدة ملفات PDF وتحديد مواقع واستخدام ال GPS ) وفى الحالتين اضاءة الشاشة بتكون على اعلى حاجة , لانى مش بحب اقلل اضاءة الشاشة ( 9/10 )

10- الذاكرة الداخلية : الهاتف مزود باجمالى ذاكرة 16 جيجا , والصافى 9 جيجا
( 7.5/10 ) لان فعلا فية مساحة كتيرة متشالة على الفاضى

التقييم النهائى : الهاتف دة من اروع ماانتجت سامسونج , بجد هاتف متميز ورائع , وفية كل احتياجاتك , اللى وزيادة , وبجد بجد موبايل مش ناقصة حاجة , وخصوصا موضوع البطارية اللى ماشاء الله علية قوى جدااااااااااا , عكس ماكانت كل الناس بتقول

موضوع بقى السخونية , التليفون مش بيسخن اصلا , ولا مع مكالمات او العاب او نت مهما طالت مدة التشغيل

يعنى محدش يشغل بالة بأى حاجة من الحاجات دية ( والله كلة كلام بيتقال وخلاص ومحدش عارف حاجة ) , وعلى فكرة يقدر يتحدى اى تليفون بكل جدارة وبكل قوة , لان فعلا الهاتف من اقوى الهاتف اللى موجودة فى السوق واديلة تقييم ( 9/10 )

ودية شوية SCREEN SHOTS









اارجو ان يكون التقييم عجبكوا وانا مستعد لاى مناقشة

هام جداااااا*** الى كل الاعضاء .. سواء ليهم اكونتات هنا او زائرين فقط

بسم الله الرحمن الرحيم

البوست ده يارب اقدر اكرره كل اول شهر
كلنا بنسعى ورا الموبايلات الجديده لآنها وسيله لرفاهيتنا
بنصور بيها وبنتفرج على صورنا وفديوهاتنا وبنلعب ونتسلى ونتكلم
الموبايلات كلها مختلفه فى كل حاجه الا حاجه واحده بس بتجمعهم
حاجه واحده بس ممكن كل الموبايلات تعملها
الموبايلات كلها بتشترك فأنها ممكن تنقذ روح وتستر جسد وتأكل ام وطفل وتصرف على يتيم
كل الى هتعمله انك اول كل شهر تشحن بـ35 جنيه بس . وهتبعت 7 رسائل لـ7 ارقام
قيمه كل رسالة 5 جنيه فقط
جوه الصورة دى فيه الارقام وجنب كل رقم انت هتساعد مين

الصورة .....

لو ماحبيتش تساعد من فضلك ساعدنا بنشر الصورة فى كل مكان
وماتضايقش لما يجي اول كل شهر وتشوف البوست ده فى اغلب الصفحات هنا
وياريت كمان لما تشوف البوست تقلل الردود الجديده عشان البوست الناس تشوفو بشكل كويس

لو 35 جنيه كتير عليك كل شهر ابعت رسالة واحده بس بـ5 جنيه لآى رقم من الى فى الصورة
اختار تساعد طفل مريض بالسرطان . او طفل يتيم نفسه يعيش حياه عاديه
او اسره محتاجه للآكل عشان تعيش . او طفل محتاج عمليه زرع قلب

شكرا لكل واحد هينشر البوست .. وكل واحد هيحاول يحافظ ان البوست يفضل متشاف ومايضفش ردود جديده الا لو هيسأل فى حاجه مهمه

بالتوفيق ....

تقييم كامل عن الاس 4 بعد استخدام 8 شهور .


اولا السرعة :- الجهاز سريع جدا في تصفح النت واستجابة التاتش سريعة والتهنيج نادر جدا و مفيش فرق كبير في السرعة بينه وبين النوت 3 وبيشغل كل الالعاب بسلاسة وبدون تهنيج واديلوا في السرعة (8.5/10)



ثانيا الكاميرا :- الكاميرا جميلة جدا سواء في التقاط الصور او الفيديو وفيها خصائص كتيرة زي HDR , BEST PHOTO , BEST FACE , SOUND AND SHOT , DRAMA MODE , SPORTS MODE , ANIMATED PHOTO , ERASER , NIGHT MODE , PANORAMA MODE ,H و تصويره جيد جدا ليلا والكاميرا الامامية ممتازة واديلوا في الكاميرا (9/10)



ثالثا البطارية :- البطارية متوسطة القوة مع الاستخدام الخفيف ممكن تقعد من 3 : 4 ايام ومع الاستخدام المتوسط ممكن تفعد معاك يوم كامل ومع الاستخدام المتواصل ممكن تقعد من 4 : 6 ساعات وبعد تحديث ال 4.3 مشكلة السخونية اتحلت واديلوا في البطارية (7.5/10)



رابعا الشكل :- الاس 4 يتميز بشكله الانيق و نحافته ووزنه الخفيف واديلوا في الشكل (9/10)



خامسا الخامات :- الاس 4 مصنوع من البلاستيك المقوي وده عشان يخفف من وزن الجهاز و عيبه ان ظهره سهل الخدش و البصمات بتبان فيه وحلها الجراب واديلوا في الخامات (7:10)



سادسا الصوت :- الاس 4 صوته قوي سواء في المكالمات او في استماع الاغاني واديلوا (7.5/10)



سابعا الشاشة :- شاشة الاس 4 تتميز بالوضوح و النقاء العالي عشان الشاشة من نوع SUPER AMOLED وبدرجة وضوح (1080X1920 (FULL HD وكثافة بيكسلات 441 لكل بوصة واديلوا في الشاشة (9.5/10)



تقبلوا تحياتي .


youssefshabana

مساعدة يا جماعة الخير انا بشحن موبايلي الاس ٤ بالشاحن الاصلي بتاعه بتظهرلي علامة الشحن ولكن الموبايل ما بيشحنش ،، ولما احط شاحن البلاك بيري بيشحن عادي ياتري ايه السبب مع ان علامة ان الموبايل بيشحن بتظهرلي؟