semsemSiR

دية تجربة استخدام سامسونج a50 للى بيفكر يشترى الفون وبيقارن بينة وبين الهواتف الاخرى فى فئتة

اولا : التصميم :
ــــــــــــــــــــــــــــــــــــــــــــ

تصميم الفون ممتاز جدااا مع انة مش تصميم جديد ونزل فى هواتف كتير من زمان بس انة ينزل من سامسونج شىء كويس وفعلا تحس ان الفون شاشة بنسبة كبيرة جدا من حجم الفون , لكن يعيبة ان الحواف السفلية عالية شوية + ان ال DROP WATER NOTCH ممكن تضايق شوية فى الفيديوهات, لكن فى الالعاب مش هتحسها اوى
تصميم الكاميرات الخلفى حاسس انى ماسك تليفون شاومى او هواوى شخصية سامسونج فى الفون دة وانك تعرف تليفوناتها من اول نظرة بقت صعبة جدا

ثانيا : الخامات :
ــــــــــــــــــــــــــــــــــــــــــ

خامات الفون بلاستيك صريح وسهل الخدش جدااا وهتحس فعلا انك ماسك تليفون رخيص مش غالى خالص مايفرقش عن اى تليفون صينى ب 3000 جنية ,فالفون لازم جراب كويس ويكون ناعم + اسكرينة ضد الكسر

ثالثا : الاداء :
ـــــــــــــــــــــــــــــــــــ
اداء الفون مش المبهر ومش بطىء , لكن الفون السوفت بتاعتة تقيل نسبيا عن المنافسين وحصل كام لاج كدة اثناء التنقل مابين البرامج , فالبنسبالى الاداء مكنش قوى للدرجة مقارنة مثلا بسعر الفون قدام اداء زى البوكو فون من شاومى مثلا وفرق بسيط جداا فى السعر
بالنسبة للالعاب مش هتواجهة صعوبة فى تشغيل اى لعبة بس مانصحش بتشغيل الالعاب على اعلى جرافيك لان البروسيسر كدة هيكون بيشتغل بكامل قوتة وهتحس بسخونة فى الهاتف وتسقيط فريمات لكن فى المجمل الفون كويس وهيشغل الالعاب عادى جداااا

رابعا : الشاشة :
ـــــــــــــــــــــــــــــــــــــــــــــ
الشاشة جميلة والوانها ممتازة والتاتش سلس ومافيش فية اى مشاكل نهائى وسطوعها كويس تحت ضوء الشمس بس لازم تركب اسكرينة كويسة عشان ماتأثرش عليها فى النقطة دية , فى المجمل من اجمل الشاشات الفئة المتوسطة كالوان لكن كسطوع مش فارق عن اى تليفون

خامسا : الكاميرا :
ـــــــــــــــــــــــــــــــــــــــــــــــ
الفون بيجيى ب 3 كاميرات ( كاميرا اساسية 25 ميجا - 8 ميجا وايد انجل - 5 ميجا ديبس سينسور )
كاميرا السيلفى : 25 ميجا
ونقيم الكاميرات على حدة

الكاميرا الاساسية : الصور فعلا فى الكاميرا دية كويسة جدااااااا وحاجة تعتمد عليها انها تخرجلك صور كويسة جداا لكن يعيبها شىء مهم جداااااااااااااا وهو بطىء الاوتو فوكس يعنى عشان تتنقل مابين منظر ومنظر بتاخد وقت مالايقل عن ثانيتين عشان تظبط ولازم تثبت ايديك كويس وانت بتصور

كاميرا الوايد انجل : لازم تستخدمها بالنهار او فى ااضاءة قوية لكن لو استخدمتها فى الاضاءة الضعيفة هتمسح الصور فورا فعلا بتتطلع صور سيئة جداا

كاميرا الديبس : بتعمل عزل كويس وواضح ساعات بحس ان الصور سايحة خفيف اوى فى الاطراف لكن مش فى كل مرة لكن فى المجمل كويسة جداااااا

الكاميرا الامامية : كويسة جدااااااا بالنهار والاضاءة القوية , ومتوسطة الاداء فى الاضاءة المنخفضة

سادسا : البصمة :
ـــــــــــــــــــــــــــــــــــــــــــــــ
طبعا لاول مرة من سامسونج فى الفئة المتوسطة تنزل بصمة اصبع مدمجة اسفل الشاشة ودية خطوة جميلة جدا منهم بس هل ادائها كويس ويعتمد عليها فعلا
والفون فى اول نزولة كانت البصمة حرفيا محدش بيشغلها وكأنها غير موجودة فى الفون اصلا بسبب تعليقها المستمر وبتفتح مرة وعشرة لأ
سامسونج ارسلت تحديث تحسين اداء البصمة , وفعلا اتحسنت بنسبة 70% ل75% اة ماوصلتش للدرجة اللى انت عايزها ولازم يبقى صباعك موجة تماما عليها وتثبتة كويس مش تشيل وترفع بسرعة , يعنى تقدر تقول البصمة هتبقى مجرد تقنية عندك بس عايزة صبر شوية وانت بتفتح الفون ولازم لازم لازم اسكرينات مخصصة للبصمة تحت الشاشة مش اى اسكرينات هتقبلها

سابعا : الصوت :
ــــــــــــــــــــــــــــــــــــــــ
سماعة الصراحة متواضعة الاداء جدااااااااااااااااااااااااااااااااااااااااااا مش هقول غير كدة , الصوت مش نقى تماما وتحسة سايح على بعضة

ثامنا : البطارية :
ـــــــــــــــــــــــــــــــــــــــــ

اداء البطارية كويس جداااااا وبتدعم الشحن السريع 15w وبيتم شحنها خلال ساعة 43 دقيقة تقريبا , وتكفيك يوم كامل لاخرة بدون اى مشاكل , لو هنقيمها كاسكرين تايم هنقول متوسط من 7 ل 8 ساعات

تاسعا : الخلاصة :
ـــــــــــــــــــــــــــــــــــــــــــ
المميزات : ( تصميم كويس جدا - حواف قليلة فى الفئة المتوسطة - بطارية كويسة - اداء كاميرا كويس جدا - بطارية ممتازة - شاشة جميلة جداا بالنسبالى الافضل فى فئتة بلامنازع زوايا ووضوح من جميع النواحى - سوفت وير بأوبشن كويس مع واجهة سامسونج الجديدة one ui - تقنية البصمة تحت الشاشة بيحسسك انك معاك حاجة منفردة فى الفئة دية )

* العيوب : ( خامات بلاستيك - اداء مقبول اقل من المنافسين - بصمة اصبع بطيئة - صوت متواضع جدا - كاميرا الوايد انجل والكاميرا الامامية لا يعتمد عليها فى الاضاءة الضعيفة - سهل الخدش - حواف سفلية عالية نسبيا كان هيبقى افضل لو قلت شوية كان المستخدم هيحس بتناسق مابين اعلى واسفل الشاشة )

يارب يكون التقييم عجبكوا , وياريت اللى هيفكر ينقل التقييم يقول انة منقول

انتظروا تقييم كامل لل a50 خلال ايام قليلة

التقييم دة هيتعمل للناس اللى عايزة تشترى الفون خصوصا بعد نزول الاس 8

1- التصميم :

الفون تصميمة شيك جداااااااا وفعلا مبهر لاى حد هيشوف الفون مع حواف الشاشة المنحنية بطريقة فعلا تخليك تحس انك شايل تليفون متفرد مش زى اى حد
لكن اكيد تصميم زى دة هيكون لية عيوب وهية ( لازم تحافظ علية من اى صدمات لان الشاشات الايدج عموما عايزة معاملة معينة - مش اى اسكرينة هتظبط علية يعنى حتى الان اللى اثبتت نجاحها اوى هية الجيلاتين او النانو جيلاتين دول ممتازين جدا وبيعملوا حماية كويسة بس مش ضد الصدمات هية اكتر للخدوش
التصميم هنا ( 9/10)

2- الشاشة :

- طبعا ولا اروع من كدة شاشة فعلا قمة المتعة فى الالوان والتاتش وسهولة الوصول بنسبة 90% لاى حاجة بأيد واحدة بالرغم من حجم الفون والشاشة ال 5.5 ال 2k اللى فعلا الوانها حاجة خيال وزاوية الرؤية من جميع النواحى مع مشاهدة الافلام او الفيديوهات تحب تتفرج عليها فعلا , لكن بردة هقول على عيب فيها وعلى حلة
الشاشة دية وانت ماسك الفون وهتكتب على الكيبورد مثلا ان فية حروف اتكتبت ودية عشان فية بعض الحروف جاية مع الانحناء دة وحلها ثلاث حاجات
* انك تصغر حجم الكيبورد ودة موجود عندك اوبيشن لية فى الفون
* انك تثبت ايديك على الفرام الرفيع جدا وهتقدر تتعامل عادى بس مش بنسبة 100%
* الحل المثالى والتحفة جراب back cover حاجة وهم تحكم مثالى وكامل فى الفون بدون خطأ واحد وفية جرابات بتبقى slim على اول الشاشة بالظبط بس بتبعد ايديك انها تلمس الشاشة ودة افضل حل
الشاشة ( 9/10)

3- الاداء :

- اداء الجهاز دة يعتبر من اقوى الاجهزة اللى نزلت ومسكتها حتى الان بدون مبالغة حتى مع نزول الاس 8 مافيش اى فرق يذكر مابين الاتنين , واعتقد كمان بعد نزول الاندرويد 8 هيكون خيالى اكتر
بس فعلا الفون مافيش حاجة مش بيشغلها كل حاجة واى حاجة بمنتهى السلاسة ومافيش اى تهنيج يذكر ولا فى برامج ولا اى العاب واى حاجة هتحصل من الحاجات دية تأكد هتكون عيب استخدام لان فعلا الفون مابيسخنش خالص درجة الحرارة العادية
الاداء ( 10/10 )

4- الكاميرا :

- الكاميرا هنا من افضل واقوى الكاميرات اللى موجودة حاليا سواء امامية او خلفية وفيها اوبشن كتير جداا وال pro mode فعلا وهم وحاجة جميلة جدااا بس العيب اللى بالنسبالى هو انها 12 ميجا بيكسل ودة بيخلى الصورة لازم تكبر حجمها لو هتحطها على كمبيوتر , بس فعلا هتديك اضاءة وتفاصيل ممتازة جدااا يعنى فعلا الواحد يعتمد عليها فى اى مواقف
الكاميرا ( 9/10 ) للكاميرا الخلفية
الكاميرا الامامية ( 8.5 /10 ) كان المفروض يتحط فيها اوتو فوكس وشوية اوبشن تعديل

5- البطارية :
بطارية التليفون هنا 3600 ملى امبير ودية تقريبا قوى بطارية حطيتها سامسونج فى سمارت فون سواء ( s - note ) وفعلا من اقوى واجمل البطاريات اللى بتعامل معاها , فعلا الفون تقدر تكمل بية اليوم مستريح هارد يوز حاجة كدة محترمة وبيعمل معايا اسكرين تايم اون من 7 ساعات ونص ل 8 ساعات ونص وممكن يعمل اكتر بس انا بقول الاستخدام كمجمل ( العاب - تصوير - اغانى - شات - فيديوهات )
والميزة فى التليفون انة مع تفعيل خاصية الشحن السريع بيشحن من 100-0 بالظبط فى ساعة ونص بالظبط وبدون تفعيل الوضع السريع بيشحن فى ساعة و50 دقيقة يعنى شىء كويس على بطارية بالحجم دة

6- الصوت :
الصوت هنا ممتاز جدااااا عالى وواضح ونسبة نقاء عالية مش هقول 100% بس مش اقل من 95% نقاء , وخصوصا فى الفيديوهات بس الصراحة كان نفسى يكون استريو كان هيفرق جامد اوى بس للاسف سامسونج تقريبا مش ناوية تتدخل الاوبشن دة دلوقتى خالص
( 9/10)

7- الاعتمادية :

- الفون شبكتة ممتازة جداااااا فى اى مكان / الرامات الصافى منها او المتاح ليك بيكون مابين 1.8-2 جيجا بدون استخدام اى برامج او عمل كلير رام , ومع فتح البرامج مش بتقل كتير يعنى اقل حاجة مع فتح تطبيقات كتير جدااااا بيكون معاك 1.6 جيجا وكل التطبيقات معاك اكتيف يعنى جاهزة على طول مجرد الرجوع اليها هتفتح عند اخر نقطة وصلتلها وبسرعة متناهية / بصمة الفون صاروخية بمعنى الكلمة / خاصية ضد المياة فعلا ممتازة والفون اداءة هايل فيها بدون اى تأثير

عيوب الفون :
1- لازم اسكرينة عشان الفون سهل الخدش سواء من الشاشة او من الظهر
2- الافضل انكوا تجيبوا الفون دة من اول الاصداراات بتاعة شهر 8/2016 عشان فى اول اصدارات نزل بعض الهواتف فيها عيوب صناعة وهية ظهور خط وردى فى الشاشة فالموضوع دة اتشال فى الاصدارات من بعد التاريخ دة
3- عايز عناية مش عايز اهمال لانة حساس لاى صدمات او وقعة حتى لو انت شايفها بسيطة

وانتظروا مقارنة فعلية مابين الاس 7 ايدج والاس 8

طبعا كلنا عارفين ان الاندرويد 6.0.1 نزل للاس 5 بنسختية ال g900f من شهر وال gooh من اسبوع , وبما ان الاتنين زى بعض فى الاوبشن فالتقرير دة هيمشى على النسختين

* المميزات والاضافات اللى تمت اضافتها :
1- تغير كامل فى ايقونات الجهاز , اصحبت مثل واجهة سامسونج المتبعة فى اجهزتها الجديدة , والصراحة بقى شكلها تحفة وخلت الجهاز كأنة جديد

2- البصمة : اصبحت تحفة بجد بقت سريعة لابعد الحدود لدرجة ان مش لاقى فرق مابينها وبين بصمة الاجهزة الجديدة " الاس 6 - الاس 7 " , فعلا بقت سلسة جداا وحساسة اوى + اضافة اوبشن جديد ليها وهية امكانية عمل بصمة لمتصفح الانترنت

3- سرعة الجهاز بقى سريع جداا وسلس جدااااااااا

4- الرامات : اصبح المتبقى من الرامات بالنسبة للنسخة ال g900h من 900 الى 1 جيجا بدون فتح برامج و والنسخة ال g900f حوالى 700 ميجا

5- ال animation فى الجهاز تم تغيرة تماما , بقى الجهاز بينور من وضع السكون بصورة تدريجية بس طبعا فى لحظة بس غير الاول ودة غالبا للحفاظ على انوار الهاتف + ان الهاتف مع عمل لوك اسكرين لية بيقفل الشاشة بأن الطرفين بيقربوا من بعض

6- زيادة امان الهاتف بنسبة كبيرة فاصبح بأمكانك وضع الصلاحيات اللى انت عايزها لاى برنامج

7- تم تعديل شوية اوبشن فى الجهاز هتكتشفوها بعد التحديث

8- اخيرا تم الغاء برنامج ال chat on من الجهاز

العيوب :

1- عدم اضافة اوبشن ال themse ودية طبعا سياسة سامسونج عشان ماتديكش كل حاجة وتجبرك تشترى الاحدث

2- شريط الاشعارات زى ماهو ماتغيرش للون الابيض زى الاس 6


من الاخر فعلا الاندرويد 6 , نقلة جميلة جدا للجهاز وهتحس انك جيبت جهاز جديد فعلا

بالنسبة طبعا لل g900f فدية طبعا متوافرة للنسخة المصرية عادى جدا

بالنسبة لل g900h فاللى نزل ليها حتى الان دولة كازاخستان , وهية اللى تمت تجربتها على الهاتف وممتازة جداااااااااااااااا ونزلوها مافيش منها اى مشاكل او قلق

منذ ثلاثة ايام تم نزول النسخة الرسمية من اندرويد 6.0.1 لهاتف اس 5 g900f لدولة سيريلانكا وهية داعمة للغة العربية قراءة وكتابة

ماتم تغيرة فى النسخة عن اللولى بوب :

1- تغير لشكل الايقونات فاصبحت بهذا الشكل




2- تعديل البصمة فاصبحت حساسة اكتر + وضع امكانية تحديد تطبيقات محددة لا تفتح الا بالبصمة

3- نظام donze لتوفير البطارية

4- اداء افضل + استهلاك اقل للرام

5- زيادة بعض الخصائص

التحميل النسخة بواسطة الاودين لهواتف g900f فقط

تم نزول نسخة الاندرويد 6.0.1 الى الاس 5 الذى يحمل نسخة رقم g900l وهية نسخة مخصصة لكوريا
وامس تم حصول ايضا على النسخة ال g900m على المارشيميلو
وفى انتظار باقى النسخ خلال الاسبوعين القادمين

والجديد فى التحديث : a multitude of bug fixes as well as performance improvements and security enhancements. Android Marshmallow brings battery-saving Doze mode, Google Now on Tap, 200 new emojis, app permissions, app links, direct sharing options, Chrome custom tabs, and more to the smartphone

تم اختبار الاس 7 الجديد , وعملت مقارنة كاملة مابينة وبين الاس 6 فى جميع النواحى ودي تجربة للى بيفكر يشترى الفون

1- الشكل : الجهازين قريبين من بعض فى الشكل تقريبا محستش بفرق مابين الاتنين بس الاس 7 اصغر فى الايد واسمك شوية , لكن فى نظرى الاس 6 اشيك بسبب الاطار اللامع اللى بيكون حول زرار ال home والكاميرا الخلفية والخارجى ودة خلى الاس 6 يكون جذاب اكتر فى الشكل , وبالنسبة لمسكة الاس 7 بسبب الحواف اللى فى الجنب مش فارقة اوى لان الاس 6 ارفع منة بشكل واضح وكمان اخف منة

2- الخامة : مافيش اى فرق تماما فى الخامات بس حسيت ان زراير ال power - volume بقت بارزة اكتر واتحسنت شوية كضغط

3- الشاشىة : الاتنين زى بعض بالظبط بدون اى اى فرق تماما

4- الاداء : تم اختبار اكتر من لعبة على الجهاز وتجربة اختبار السرعة , والنتيجة جائت غريبة جداا ان الجهازين فتحوا فى نفس الوقت بالظبط , حتى نفس الاداء فى الالعاب ماشوفتش اختلاف

5- الكاميرا : طبعا الكاميرا بقت بتصور بأطار 4:3 مقابل 16:9 فى الاس 6 , ودة خلى الزاوية اقل شوية لكن اتعوض بأن الصورة بقت بتصور ابعد شوية عشان تعوض الفرق دة , ومحستش بأختلاف اوى مابين الكاميراتين على الطبيعة بس فى نفس الوقت الاتنين ممتازين جداااااا , حتى الفوكس فيهم سريع اوى بس فى النهاية التفوق للاس 7

6- التصفح : طبعا الاس 7 سرعة رهيبة مابعدها سرعة بجد الجهاز سلس الى ابعد الحدود , ياتى بعدة الاس 6 بفارق قليل اوى بس واضح الفرق فعلا لصالح الاس 7 فى السرعة

7- الرامات : الاس 7 المتبقى من الرامات كان مابين 1.6- 2 جيجا والاس 6 متبقى راماتة كان مابين 1.3 -1.5 جيجا يعنى الفرق مابين ال 3 جيجا وال 4 جيجا 200 ميجا فرق فى صافى الرامات

8- الاوبشن : مش حاسس ان فية فرق فى الاوبشن الا حاجات بسيطة بس اقدر اقول انة فية تحسينات واضافات اللى هيكشتفها المستخدم

9- الصوت : الصراحة صوت الاس 6 اعلى بفرق واضح , الاس 7 صوتة اوطى ودة اعتقد بسبب خاصية ضد المياة

10- البطارية: فى الاستخدام كانت افضل للاس 7 بفرق بسيط يعنى تقدر تقول كدة فى المدة كاملة من 100 % - 5 % هيكون الفرق حوالى ساعة فى الاستخدام وممكن يكون اكتر

فى النهاية : الاس 7 جهاز ممتاز فعلا , لكن اللى معاة الاس 6 مش لازم يغير الا لو محتاج الكارت الخارجى وضد المياة

بس سامسونج كانت لازم تدى لمسة جمالية اكتر للهاتف - سعرة لازم ينزل شوية

نزول او نسخة رسمية من الاندرويد 6.0.1 مارشيميلوا للنوت 5 n920c , لدولة كمبوديا

اللى عايز بقى ينزلة بالاودين يتفضل

تحديث جديد وصل انهاردة الصبح للاس 5 ال G900H , لنسخة مصر

التحديث اضاف ال SMART MANAGER , واضاف احدث نسخة من ال SECURITY PATCH

تحديث 5.1.1 , اعلنت عنة سامسونج انة هيكون متاح للنوت 3 نيو بكل فئاتة
وقريبا جدا هتلاقوة على التحديث الهوائى

شوف ياباشا عشان فية مشكلة فى اضافة تعليق على نفس مكان السؤال

عموما انت لو غطاء ال usb اتكسر منك , فكل اللى هتعملة انك هتشترية من التوكيل ( لازم اصلى )

تمنة تقريبا من 75-100 جنية

هتفك مسمار واحد بس من تحت اللى هو على الشمال , المسمار دة لما يتفك هتلاقى غطاء , شيلة براحة لان تحتية جوان مطاط , وبعد كدة ركب الغطاء الجديد ( usb ) وبعد ركب الغطاء واقفل المسمار كويس

انا عملت اختبار شامل للنوت 5 , فى جميع النواحى مابينة وبين النوت 4 N910C ودة تقرير مفصل عشان اللى عايز يعرف الفرق مابين الاتنين

1- الشكل : الصراحة تفوق واضح للنوت 5 فى جميع النواحى ( شكل امامى - خلفى - جابنى )

النوت 5 يتفوق بجدارة

2- الخامات : النوت 5 خاماتة ممتازة وتفوقت بجدارة على خاامات النوت 4 , بأستنثاء بس اللى معجبنيش موضوع البصمات اللى بيعلم على الظهر الزجاجى , غير كدة تحفة

النوت 5 : يتفوق بجدارة

3- الشاشة : الوان النوت 5 واضاءة النوت 5 فرقت حاجة بسيطة عن النوت 4 , يعنى بقت الاضاءة اعلى وبالتالى خلت الالوان واضحة اكتر

النوت 5 : يتفوق بفرق ضئيل

4- الاداء : واضح جدا , التغير الواضح على السوفت وير ومدى اداءة على سرعة استجابة الهاتف , فعلا الهاتف سريع جداااااااااا , اسرع بفرق ملحوظ من النوت 4 , وكمان سرعة فتح البرامج والالعاب اسرع من النوت 4 بس مش بفرق كبير , تقريبا ثانيتين ونص فرق لصالح النوت 5

والرامات ممتازة جدااااااااا ,استهلاك وصافى , يعنى كان فاضى فى الراامات للمستخدم من 1.8 الى 2 جيجا , طبعا مقابل , 500 ميجا فقط للنوت 4 , مع ان النوت 5 كان نازل علية كمية صور وبرامج والعاب كتير جداااااا , واكتر من النوت 4

تفوق واضح للنوت 5

الكاميرا : الصراحة مافيش فرق فى النهار غير بس ان النوت 5 بيصور اقرب شوية من النوت 4 , مع ان الاتنين فى نفس المكان وزاوية التصوير , لكن فى الليل هو اللى فرق فعلا بس مش بفرق كبير , يعنى تقدر تقول الصورة صافية اكتر ومنورة اكتر وتفاصيل افضل

النوت 5 يتفوق بفرق بسيط

الاوبشن : طبعا النوت 5 افضل اوبشن من النوت 4 بس بفروقات بسيطة

القلم : مواصفات القلم فى النوت 5 شكلا واداء وسرعة واوبشن وحساسية افضل من النوت 4 بفرق كبير , وخامات القلم نفسة وطريقة اخراجة , الدنيا اتغيرت تماما

النوت 5 يتفوق

يتفوق النوت 4 على النوت 5 فى : امكانية تركيب كارت ميمورى - ال IR- BLASTER - البطارية قابلة لازالة

من الاخر اى حد بيقول النوت 5 مش متطور عن النوت 4 , لازم يعيد النظر فى الرأى دة , ويمسك النوت 5 مرة واتنين وثلاثة , ساعتها هيحس بفرق فعلا و هو اة الفرق مايستاهلش يكون 2000 جنية
بس فعلا النوت 5 نقلة محترمة جداااااااا لفئة النوت

التقييم النهائى : ادى النوت 5 تقييم 9.5 /10 , لو كان التليفون دة فية كارت ميمورى وفية IR-BLASTER - ضد المياة - بطارية قابلة للازالة , كنت هديلة 9.8 / 10

الهاتف نزل مصر وسعرة خارج التوكيل او موبايل شوب

4350 جنية , طبعا سعر خرافى على هاتف بالاوبشن دة

اللى بيدور على الاس 5 ال 3جى " g900h"

الهاتف موجودة فى موبايل شوب وسعرة 4000 جنية