بدون عنوان

للرجوع الي صفحة سوني Xperia Z1 الرئيسية اضغط هنا

omyoussef

2014-03-05 (12:44:05PM)

رجعتلكم بعد غياب فترة صغيرة و قلت اعملكم ريفيو صغير عن تجربتى مع Z1 بعد 3 شهور استعمال
هاتكلم بصراحه من ناحية المميزات و العيوب لان الواحد لما بيجيب موبايل فى الاول بيبقى مبهور بيه وبأمكانياته ومش شايف فيه اى عيوب بس بعد فترة بيكتشف سلبيات واكيد مفيش موبايل خالى منها
بالنسبة لتجربتى و الله يكرمكم حطوا خط تحت كلمة تجربتى دى لان اللى انا شيفاه مثلا عيب ممكن غيرى يشوفه ميزة ف ياريت نحترم آراء بعض
المهم
مميزات الجهاز بالنسبالى
1. سرعه تاتش هايلة و استجابة سريعه جدا للاوامر
2.سرعه تصفح عالية
3.مفيش تهنيج خاااالص
4. شكل شيك مش منتشر و حجم معقول
5. الجهاز وزنه تقيل و دى بالنسبالى ميزة مش عيب بس لاقيت بعض الاشخاص بيشتكوا منها
6.خامات تصنيع ممتازة و تتحمل
7.ضد المايه طبعا

العيوب
1.الكاميرا .. بصوا هى الكاميرا كويسة بس عايزة حد يعرف يتعامل معاها يعنى انا جربتها بالنهار وباليل كانت كويسة جدا على الوضع الاوتوماتيك انما على الضبط المانيوال طلعت احلى كتير بس عموما مش هى الجودة اللى كنت منتظراها من كاميرا 20 ميجا بيكسل وعدسة زى دى
2. موضوع ان اللون الابيض فى الشاشة مش ابيض دى حاجة مش حلوة .. اللون الابيض تحسه مصفر كده او ترابى مش ابيض ناصع
3. الوان الشاشه هادية زياده عن اللزوم و دى عند بعض الاشخاص ميزة مش عيب ان الالوان اقرب للطبيعيه عنها للمشبعه
4. السوفت وير عايز اهتمام شوية
5. قله انتشار الاكسوارات .. هى موجوده بس عايزة لف و كمان عايزة تنوع شوية فى الالوان والاشكال
6. خسارة فى اعادة البيع يعنى اللى هايجيب الموبايل يعمل حسابه انه هايقعد معاه شوية انا كنت ناوية ابيعه للتغيير مش اكتر بس جالى اسعار غريبة كده ف استحرمت بصراحه لان الجهاز استعمال شهور و كمان امكانياته حلوة فحرام يتباع بخسارة كده
بالنسبة للصوت
الصوت يا جماعه مش واطى وربنا :) الصوت بالنسبالى كويس ومسموع هو اعلى من الزد بدرجتين تقريبا بس بسمعه وانا فى الاوضة التانية و كمان لو حطيت نغمه اصلا عاليه بيبقى فرح :)
دى تجربتى مع Z1
تتفق او تختلف معايا ده حقك .. بس يبقى الاحترام سمة النقاش
دمتم بخير

zamaleksc

2014-03-05 (01:07:08PM)

ريفيو حلو بس عيب سونى انها المفروض تهتم بالصوت شويه و انها تقلل الفريم الى واخد مساحه كبيره على الفاضى و مكبر الموبايل قووى

omyoussef

2014-03-05 (01:23:00PM)

ده عيب نسيت اقوله فعلا
الفريم واخد مساحه على الفاضي
يا اما كانوا نزلوا زراير الهوم والباك تحت فى الفريم نفسه بحيث يستغلوا المساحه الفاضيه يا اما لو هاتفضل فى الشاشة يبقى يقللوا الفريم الفاضي لانه فعلا كبير
بس ده عيب عموما فى اجهزة السونى زى ما حضرتك قلت مش فى الموديل ده تحديدا
بالنسبة للصوت اوافقك الرأى بس فى خبراء بيقولوا ان ده راجع ان الموبايل مقاوم للماء ولو هانقارن الموديل ده بالزد المقاوم للماء بردو هنلاقي فرق كبير فى الصوت لصالح زد وان .

walidelsaid

2014-03-05 (04:55:34PM)

اتفق معك تماما يا أخت omyoussefفي كل ما ذكرتيه من مميزات وعيوب والأهم من كل ده أن حضرتك نورتي الصفحه تاني وخاصه زي ما قلت قبل كده أن حضرتك عندك صبر في ذكر التفاصيل بالإضافة للموضوعيه في اراءك بدون مبالغه
عموماً انا بعت الموبايل اول ما جاب سعر كويس لواحد صاحبي وده سبب بيعي له بالإضافة وبعيد عن السامعين انا مجنون بالموبايلات ويمكن أجيب اليوم HTC ONE

omyoussef

2014-03-05 (11:28:26PM)

حلوو اووووي
لو جبت htc one يهمني جدا رأيك لاني كنت هاجيبه بدل السوني بس قلقوني منه علشان قله الاكسسوارات و ان مالوش صيانه بس انا كان عاجبني اوووي ف هانتظر من حضرتك ريفيو عن تجربتك معاه

walidelsaid

2014-03-06 (02:38:59AM)

omyoussef
شوفي يا ستي .. دي تجربة حوالي 4 ساعات
الانطباع الاول عن الموبايل .. شكلة اكتر من رائع وخاماته عالية جدا وحجمة ممتاز ( يمكن انا شايف الحجم صغير لأني كان معايا النوت3 ) وطبعا مفيش بصمات اصابع مزعجة زي ال Z1
الشاشة من اروع ما رأيت وهي مايجب ان تكون علية شاشة اي موبايل
الصوت روعه
السرعة ممتازة
الكاميرا جربتها كويسة جدا جدا
دي كانت المميزات اللي اقدر اقول عليها
العيوب بالنسبة للبعض ان البطارية غير قابلة للازالة وان كنت مش فاهم ابدا ايه العيب في كدة ما الايفون من يوم ما نزل وبطاريتة كدة
مفيش ميموري كارد .. اظن يعني 32 جيجا مساحة مش قليلة
HTC زيه زي ال Z1 رغم التميز في الشكل بس اعادة البيع مشكلة لان لازم تلاقي اللي عايزة ومهتم بيه مش ماشي ورا الحاجة اللي الكل ماسكها
واجهة المستخدم غريبة شوية بالنسبة لي .. هي شكلها متميز جدا ورائعة بس عايزة تعود
في النهاية هي اطلالة سريعة استجابة لطلب الاخت omyoussef وفي العموم الموبايل فعلا حالة خاصة وتجربة مغايرة للاندرويد

omyoussef

2014-03-06 (03:27:10AM)

جميل جدا
وبشكرك جدا على سرعة الاستجابة
عايزة اعرف اخبار البطارية ايه بس مش الاستاند باى انا عايزة اعرف فى حاله الشغل العالى يعنى واى فاى و جيمز وكده
و السخونية
مش فى دماغى حاجة تانى دلوقتى بس اسمحلى كل ما ييجى فى دماغى حاجة هسألك معلش

walidelsaid

2014-03-07 (02:05:22AM)

السلام عليكم omyoussef
اولا حضرتك تسألي في اي وقت وتحت امرك
ثانيا بالنسبة لأسألتك
البطارية .. انا استخدامي نت وتصفح وتنزيل تطبيقات من الماركت وحوالي 10 مكالمات خلال اليوم لمدة ساعة تقريبا وتجربة كل حاجة في الموبايل والتقاط بعض الصور ( وبالمناسبة انا مش غاوي تصوير بس فعلا الكاميرا انا شايفها كويسة جدا )والبطارية كانت 100% الساعة 8 ص واغلقت الجهاز حوالي الساعة 12 وكانت 40% لكن بالنسبة للألعاب مش هقدر احكم لاني بردو مش غاويها وعموما انا لم اشعر بأي سخونية اثناء استخدام النت لكن لن استطيع الحكم بشكل حقيقي عن موضوع السخونية
شوفي اي استفسار تاني يجي علي بالك وانا تحت امرك واكون كمان قدرت اجمع صورة اشمل للموبايل لانه يدوبك ده اول يوم في استخدامه

omyoussef

2014-03-07 (02:58:00AM)

وعليكم السلام ورحمة الله
الامر لله متشكرة لذوق حضرتك
كده تمااام لحد دلوقتى
ومع استعمال يوم بس اكيد مش هاتقدر تحكم عليه
نستنى اسبوع كده ونشوف ايه الاخبار :)