درجات benchmatk سيئة جدا !!

للرجوع الي صفحة ال جي G Pro Lite Dual الرئيسية اضغط هنا

Mo2menCR7

2014-04-18 (02:36:50AM)

السلام عليكم .. اولا انا سعيد ان انضميت للموقع الجميل ال منور باعضائه ال زي الفل دول :) وكان نفسي ادخل من بدري بس التسجيل كان مغلق
المهم .. انا من كلام استاذ وليد وباقي الاعضاء الافاضل عرفت ان الجهاز ده باختصار جبار
بس انا بحب اشوف فيديوهات اي موبايل ع اليوتيوب زي فتح الصندوق والمراجعة والالعاب والبنش مارك وكده .. ف لقيت فيديو للبرو لايت ده محقق نتائج سيئة جدا بعيدة كل البعد عن كلام حضراتكم لدرجة ان شكيت ان الفيديو ده مضروب :D ف كنت عايز اتأكد من حضراتكم من حكاية البنش مارك دي لو حد يعملها ويوريني النتائج
ثانيا بقي معلش .. بعيدا عن حكاية الفيديو ده كأنه لم يكن وان الجهاز حلو .. بعيدا بقي عن انه متجرب وكده ونأخد بالمواصفات "المكتوبة فقط " هل ده اشتريه افضل ولا استني الموبايل الجديد LG L90 dual .. وشكرا مقدما لحضراتكم ومرة تاني اتشرفت بانضمامي هنا :)

ده لينك الفيديو البنش مارك

mnagib2010

2014-04-18 (11:46:43AM)

وعليكم السلام
انا شايف ان الرانك مش سيئة جدا مقارنة بسعره. بل على العكس كويسة جدا. ما هو حضرتك مينفعش تقارنه ب s3 او نوت 2 مثلا. قارنه بالموبايلات اللي في نفس سعره. صدقني ياباشا الموبايل جميل جدا وعن تجربة شخصية. ده كفاية البطارية 3140 mah. يعني افضل من بطاريات كل موديلات الجلاكسي اس. وشكرا

Mo2menCR7

2014-04-18 (04:22:34PM)

شكرا لرد حضرتك .. بس الموبايل مش بطارية وبس .. بس انا بعتمد ع البنش مارك ف الموبايل عشان انا مدمن العاب .. انا كنت عايز حاجة كويسة ف حدود 2000 ولما شفت كلام حضراتكو قولت هو ده الموبايل ال هشتريه بس تقريبا الفيديو ده خلاني متردد .. وع فكرة ممكن اعلي بالسعر لحد 2500 بس تكون حاجة نضيفة ال جي او سوني غير كده لا ف الواحد محتار

mnagib2010

2014-04-18 (04:44:23PM)

عن نفسي. مليش في الالعاب جامد بس الاستاذ وليد كان بيقول انه شغل عليه العاب كبيرة بصورة ممتازة. هو يقدر يفيدك اكتر في النقطة دي

Mo2menCR7

2014-04-18 (06:24:29PM)

انا شفت فيديو فيفا 14 عليه كانت بتهنج جامد .. وف انتظار رد استاذ وليد .. وع فكرة انا قولت عايز ال جي او سوني بس تقريبا ممكن يتحط معاهم لوميا 1320 لانه جامد برده وزي م قولت محتار :/

01275769955

2014-04-18 (08:55:04PM)

1320 بدون تفكير ,,, شاشه وبطارقه وبوسيسور محترم عايز ايه تانى بقي وكمان نسيت اقولك على تحديث 8.1 هيخلى الموبايل حاجه تانى

waleedsunny

2014-04-19 (12:00:30AM)

شوف حضرتك انا للاسف بغير موبايل تقريبا كل شهر
ويوميا ممكن اتفرج على ريفيوهات موبايلات من جميع الماركات اللى ماحدش حتى بيفكر فيها بعدد كبير جدا
وكنت مهتم جدا بموضوع البنش مارك وبقيم على اساسه لحد ماكتشفت ان الموضوع ده فعلا فشنك
شوف الكاتيل c5 ب 850ج كان معايا وليه فيديوهات جابت البنش مارك 11000 ومقدرش يشغل اسفلت 8 والكاتيل c7 ب 1100ج وبرده قعد معايا يومين من واحد زميلى جاب على البنش مارك 16000 وطبعا جهاز امكانياته معروفه وراماته 512 والهواوى 610 الاعلى منه جاب 11300
المفاجأة بقى ميجا 5.8 جهاز زميلى جاب 15200 وجهاز المدام جاب 13300 والجهاز اللى معايا جاب 11800
وال 3 اجهزة نفس الموديل ونفس ارقام نسخة اﻻندرويد بالظبط
تقدر تقولى ازاى 3 اجهزه نفس الموديل وب 3 قراءات مختلفة وبعيد عن بعض على برنامج ال an tu tu
ده بس امثله بسيطه جدا وانا كل ما اجيب جهاز اشوف قرأته على البرنامج ده عشان اثبت لنفسى ان البرنامج ده غلط ومس عارف ازاى المواقع العالميه بتاخد بيه انا جربته على اكتر من 30 جهاز والنتيجه القيها مختلفه تماما عن أداء الجهاز
على العموم انا كنت محمل لعبة ريل ريسنج3 على البرو ﻻيت وكانت شغاله تمام
لكن خد بالك من حاجه مهمة جدا
البرو ﻻيت معمول لفئة معينه من المستخدمين
فئة عايزه جهاز شاشه كبيره وواضحه جدااا عشان النت والفيديو
بطاريه قويه جدا عشان النت والمكالمات
خطين
صوت مكالمات عالى جدا
صوت نغمات عالى وده باين من تصميم السماعات اﻻستريو
انا بعتبره منافس للنوت2 بس بخطين وسعر رخيص
يعنى الألعاب حاجه فرعيه مع انى زى ماقلت كنت محمل ريل ريسنج3 مساحتها 1.5 جيجا
لكن الجهاز مش مصمم للألعاب بالدرجه الاولى

Mo2menCR7

2014-04-19 (06:37:53PM)

شكرا لرد حضرتك يا استاذ وليد والاستاذ ال قبل حضرتك .. بس يا استاذ وليد انا شايف ان كده لوميا 1320 افضل من البرو لايت لانه بيشمل كل الحاجات ال حضرتك قولت عليها بالاضافة انه ف الالعاب حاجة روعة الصراحة .. مش كده برده ?

Mo2menCR7

2014-04-19 (06:41:26PM)

ولا استني lg l90 dual :( .. وانا ميفرقش معايا ويندوز او اندرويد او خط ولا اتنين .. المهم حاجة محترمة

waleedsunny

2014-04-20 (12:00:55AM)

بص حضرتك
انا والحمد لله فى فترة بسيطة جدا كسبت ثقة وحب اﻻعضاء فى المنتدى بفضل الله اولا
وثانيا بسبب ان امين جدا فى النصيحة للاعضاء عشان على اساسها هايشترى ولا لأ
اولا ماينفعش تقول مش هايفرق معاك الويندوز من الاندرويد
مافيش اى وجه مقارنه بينهم فى اى شىء
مبيعات الويندوز فون فى مصر لا تتعدى نسبة ال 5% بالنسبة لمبيعات الاندرويد
على فكرة انا مابتكلمش على ماركة انا بتكلم على سوفت وير
ثانيا برده مافيش حاجه اسمها مايفرقش خط ولا خطين
اهم شروط الاختيار الصحيح هو تحديد المتطلبات اللى انت عايزها بالظبط عشان تجيب حاجة ماتندمش عليها بعدين
فى الاندرويد الاجهزة بخط واحد دايما امكانيتها ومواصفاتها على من الاجهزة اللى بخطين
اللوميا كل اللى اشتروه مابيشكروش فى الكاميرا خالص
فى بعض اللى استخدموه فى الخارج بيشتكوا من سخونه شديدة فى الجهاز ممكن تكون شكاوى فردية
شوف حضرتك محتاج ايه بالظبط وتدور فى التليفونات اللى فيها المميزات دى
ماينفعش اقارن جهاز بخط واحد ويندوز فون بجهاز بخطين اندرويد
لازم اقولك كده عشان النصيحة امانه

Mo2menCR7

2014-04-20 (02:22:40AM)

يا استاذ وليد انا عارف حضرتك امين معانا ف النصيحة وكل حاجة وصبور كمان وعشان كده حبيت اتناقش معاك واستحملني :D
انا كان قصدي مش هيفرق معايا النظام لان بالنسبالي النظامين جامدين وثانيا انا اصلا شغال بموبايل خط واحد ف مش هيفرق معايا لو كان الموبايل الجديد هيكون بخط واحد برده .. ارجو حضرتك تكون فهمتني
ثانيا اي نظام جديد لازم تكون مبيعاته قليلة ف الاول .. الاندرويد متولدش بالطريقة ال هو عليها دلوقتي وكمان ويندوز 8.1 الجديد فيه مميزات كتير جدا وعاجباني وبرده حضرتك عشان مش تفهمني غلط ده مش معناه اني بفضل الوندوز فون ع الاندرويد ولا حاجة انا بقول رأيي ف النظام مش اكتر .. انا ال يهمني ف الموبايل اولا واخيرا ف الموبايل رام وبروسيسور وبطارية عشان الالعاب بس من شركة محترمة اكيد .. وانا مع حضرتك ف حتة الكاميرا وحشة ف لوميا 1320 وقعدت ورا الموضوع ده لحد م اكتشفت ان لوميا 820 افضل .. المواصفات تقريبا واحد بس 820 كاميرا ممتازة جدا وخصوصا ف الليل او الاضاءة الضعيفة وده مش كلامي .. ده كلام ناس مجربة
حضرتك برده انا مش بقول البرو لايت وحش بس حتة الالعاب التقيلة قالقاني شوية عشان شفت فيديو فيفا 14 عليه بتهنج جامد

mrmaxmaz

2014-05-05 (05:42:56AM)

لو عاوز جهاز للالعاب التقيله عندك الهواوى جى 610 و محمل عليه لعبه اسفلت 8 و GTA SA و GTA Vice City و لعبه ديد تيجرات و لعبه روبو كاب 3 و كل الالعاب الصغيرة زى تمبل ران و صب واى
الجهاز ماشاء الله عليه الحمد لله مفيش لعبه ما اشتغلتش عليه
لو عاوز جهاز للنت و المكالمات الكبيرة و شاشه رائعه للتصفح و القراءة يبقى البرولايت

تلك الخدمة مخصصة للأعضاء فقط