بدون عنوان

للرجوع الي صفحة ال جي G Pro Lite Dual الرئيسية اضغط هنا

sky79

2014-01-30 (02:44:52AM)

السلام عليكم
بما ان الميزانيه تتراوح بين 1500-2000 والمهم عندي
1- الكاميرا ودرجة وضوحها في الفيديو والصور
2- النت وسرعته على برامج محدده زي الفيبر والتانجو والاسكيب علشان بكلم اهلي بره يوميا
3- مساحه الشاشه لا تقل عن 5انش
فانا بقارن بين هواوي 610 و جهاز الجي برو ليت
خايفه من كاميرة الهواوي لاني بحب اصور بناتي كتير بس سعره بالنسبالي احسن طبعا
كزوجه بتحب التوفير ففيه فرق حوالي 600 او 700 جنيه انا اولى بيهم - اقصد احنا
بس لو كاميرته ( الهواوي ) مش حلوة يبقي امرنا لله
افيدوني افادكم الله
ويسلام بقه لو حد يبرجلي دماغي ويقترح على حاجه جديده :((

AndroidMan

2014-01-30 (03:02:18AM)

بتهيالي ال sony Xperia c ارخص من g pro lite ...
100 ج او اكتر شوية وشاشتة 5
هو سعرة في محل 888
1975 ج
ولو عاوزة تشوفي امكانياتة ادخلي صفحتة في قسم السوني في الموقع وشوفي الامكانيات ومشاكلة مع الاعضاء اللى معاهم الموبايل في التعليقات :)

AndroidMan

2014-01-30 (03:11:35AM)

والبروسيسور في ال c اقوي لانو quad core مش dual core و 1.2 ghz
بس بما انك بتهتمي بالكاميرا اوي وبرامج الشات اللي منها شات الفيديو الاسكايب والتانجو هيبقي ال C مش كويس ليكي لان الكاميرا سمعت انها مش اوى والكاميرا اللي قدام اللى هي لمكالمات الفيديو السكايب والتانو وغيرهم اللي معاهم الموبايل بيقولو وحشة جدااا
فا بتهيألي ده هيبقي عيب بالنسبالك :)

hardtime

2014-01-30 (04:00:09AM)

sky79
بصى يا قمر
هنعمل مقارنة بين افضل موبيلين بالسعر دة اكسبيريا c وكمان ال جى pro lite
اكسبيريا ى افضل من ال جى بالاتى:_
1-كارت النت افضل ودة بيخلى النت اسرع شوية
2-برسيسور اقوى ودة بيخلى الجهاز اسرع شوية

ال جى بروا لايت يتوفق بالاتى على السونى
1-ذاكرة داخلية اكبر(الضعف)
2-كاميرا افضل امامية وخلفية
3-بطارية اقوى بكتير
4-الصوت احسن
5-نوع الشاشة افضل
تمام كدة يا قمر اختارى انتى بقى انتى عايزة اية

waleedsunny

2014-01-30 (09:02:35AM)

بصى يأستاذه
اولا ال 610 جهاز جميل جدا وامكانياته عاليه وسعره مالوش منافس
بس موضوع الكاميرا الاماميه ماعرفش عنها حاجه
السونى سى جهاز جميل وبقى اجمل بعد الابديت الاخير لكن الكاميرا الاماميه متوسطه وصافى الشاشة بتاعته 4.8 بوصه عشان زراير التحكم داخله ضمن الشاشة
ال جى شاشة كبيره وحلوه قوى كاميرا اماميه نضيفه جدا وممكن تعلي الريزليوشن بتاعها من ضبط الكاميرا ولسه مجربها بطاريه مالهاش حل ومش عايزين نكلم تانى على موضوع البطاريه عشان مايحسد المال الا اصحابه
اهم حاجه بقى حضرتك هاتتكلمى فايبر وسكايب وتانجو من ال 3جى ولا من الواى فاى
لو من الواى فاى مافيش مشكله وكل البرامج هاتشتغل سريعه وزى الفل
لكن لو 3جى لسه واحد زميلى حب يكلم اخوه فى الخارج عن طريق السكايب ماعرفش يكلمه راح فودافون قالولا شريحة حضرتك لازم تتغير عشان تدعم الخدمه وفى اشتراك 25 ج غير اشتراك النت الاساسى لتشغيل برنامج السكايب - ماعرفش بقيت الشبكات زى موبينيل واتصالات نظامها ايه
الخلاصه عشان ماتتعبيش نفسك
لو الميزاينه فى حدود 1500ج يبقى 610 زى افل وهايدى متطالبات اى حد - بس لازم تتأكدى من موضوع النغمات لان اللى اشتروه بيقولوا صوته متوسط
ولو ربنا كرمك وحبيتى حاجه اكبر وافضل يبقى ال جى برو لايت بإذن الله
وعلى فكره السونى سى مش موجود عند 888
للاسف هما بيعملوا حركه مش تمام بينزلو سعر على الموقع بتاعهم يضرب السوق كله حتى سعر الجمله ولما تروح عشان تجيب الموبايل يقولك هو حضرتك لما ينزلى هابيعو بالسعر ده ولو حضرتك عايزه سيب نمرتك فى الحجز عشان اول مايجى نتصل بحضرتك ونحجزهولك وعملوا معايا كده فى ال جى برو لايت من قبل يوم 7-1-2014 ومع زمايلى بخصوص الكاتيل هيرو من اكتر من شهر
مع انهم فعلا ارخص الاسعار فى مصر لكن لما تكون عندهم الحاجه فعلا

hardtime

2014-01-30 (09:20:09AM)

بص يا عم وليد الاسكاى بى مش شغال على 3 شبكات
ﻻنوا ممنوع فى مصر بموجب جهاز حماية الاتصالات
لكن شغال بس على خطوط الداتا
وان كان ولابد تشغلوا تقدر تروح صفحة النوت3 هتلاقينى عامل فيديوا فية شرح
ازاى تفتح الماركت الامريكى وكمان تشغيل الاسكاى على نت الثرى جى
تمام كدة

waleedsunny

2014-01-30 (10:59:13AM)

استاذ hardtime
كلام حضرتك صحيح
بس فودافون قالت لزميلى بالنص انه لو عايز يشغل السكابى على الشريحه هايدفع 50ج تمن شريحة فودافون جديده بتدعم الخدمه غير اشتراك شهرى ب 25ج غير اشتراك باقة النت اللى هو مشترك فيها
الكلام ده كان الاسبوع اللى فات
وحاليا هو بيكلم اخوه على برنامج الفايبر والتانجو - واخوه كلمه من بره وقاله على برنامج جديد اسمه TALKRAY وفعلا حمله امبارح ويقدر يكلمه صوت او شات
وشكرا لرد حضرتك السريع

sky79

2014-02-04 (12:35:14AM)

مش عارفه اشكركم ازاي ... فعلا افدوتني جدااا
androidman انت خلتني اخد بالي من حاجه مهمه في موضوع البروسيسور فشكرا ليك بجد
hardtime متابعه كل ردودك وانت تقريبا كنز معلومات ..ماشاء الله عليك
waleedsunny مش جديد عليك الذوق والاهتمام في الردود
فعلا انا بشكركم جدا وعلى لقاء قريب باذن الله لما اقرر واجرب

تلك الخدمة مخصصة للأعضاء فقط