بدون عنوان

للرجوع الي صفحة هايسنس U4 الرئيسية اضغط هنا

AliAfify

2013-06-09 (10:06:13PM)

الموبايل جميل إشتريته إمبارح والحمد لله الموبايل طلع عند حسن ظنى , والطريف فى الموضوع إن كان معايا ابن خالتى وأنا بشتريه وكان قرفان منه قوى وعمال يقولى بلاش تشتريه ويقولى انتا هترمى فلوسك ومش هتعرف تتصرف فيه بعد كده وخليلك فى السامسونج أو خليك فى أى حاجه عاليه , وحتى كان قرفان يبص عليه فى الفاترينه :) ولما الراجل جابه من الفاترينه وشافه قال والله جميل لدرجة انه شافه مش بعيد مقارنة بسعره ومواصفاته عن الاس ثرى اللى معاه .
وللعلم دى أول مره أشيل سمارت فون .. بس حبيت أنقل إنطباعى عن الجهاز وشوية ملاحظات عنه :
- الجهاز جميل جدا بالنسبة لثمنه .. خاماته حلوه وشكله مميز بإستثناء الاسكرين بروتكتور اللى عليه , وبصراحة أكتر بإستثناء كلمة اللوجو اللى على واجهة الجهاز ( كان المفروض تتكتب بطريقة أرقى من كده وبحجم أصغر شوية ) , وزنه تقيل نوعا ما .
- التاتش بتاعه رائع وكويس ونظام التشغيل "اندرويد فور فعلا" ( كنت متخوف من إنه يكون حاجه مجهولة المصدر ) .
- بصراحة الكاميرا لم تلبى طموحاتى كـ كاميرا 5 ميجا بكسل ( تقيلة نوعا ما وبحس كده إن عايز احنط الشخص اللى هصوره يعنى أثبته ميتحركش وأنا كمان متحركش علشان الصورة تطلع مظبوطه وكويسه ) وبتعمل صوت غبى كده عند أخذ الصورة .
- الشاحن شكله رخيص خالص , ومش ماشى مع تقفيل وخامات الجهاز , وكان المفروض الشركة تهتم أكتر بالكرتونة الخارجية وبالشاحن وبدليل المستخدم أكتر من كده ... دليل المستخدم مش بيقدم عرض شارح وكافى ووافى , وكمان خاماته سيئة .. بس طبعا كل املاحظات عن التليفون فهى ثانوية ومش ذات أهمية شديده , الهاند فرى شكله عادى ومش مريح بالقدر الكافى لكنه بيخرج الصوت نقى وسلس .
لازم الشركة تستعجل فى موضوع الإكسسورات بتاعته لأن الجهاز حجمه كبير مش صغير وشكل خاماته حساسه شوية , ولازم الشركة تهتم بجودة وخامات الإكسسوارات , ويكون إهتمامها بالمشتملات والإكسسورات زى إهتمام بالموبايل بالظبط .. لأنى حسيت كده إنها عملت الموبايل نفسه فوق السلم وعملت الكرتونة والشاحن والهاند فرى ودليل الإستخدام تحت السلم :) مع العلم إن تكلفة الحاجات مش هتفرق كتير معاهم بالنسبة للفلوس .. بس هتفرق معاه فى تسويق المنتج وإقناع الناس بيه .
الخلاصه :
جهاز أكتر من رائع بالنسبة لإمكانياته الكتيرة مقارنة بسعره المتواضع ( إشتريته بـ 1070 جنيه ) كسرعة جهاز ونقاء وحجم شاشة وخامات وشكل خارجى مقبول وتاتتش رائع ( البطارية لسه مقدرش أحكم عليها دلوقتى ) .
أنا حاولت أنقل تجربة يوم مع الجهاز , وهى مش نظرة تشاؤمية ولا تفائلية قد ما هى محاولة منى لعرض إنطباعى عن الجهاز .
اتمنى من أهل الخبرة التواصل معايا لأنى لايص فى شوية حاجات مش عارف أعملها .. خصوصا زى ما أنا قلت فى أول الكلام إن ده أول تعامل ليا مع سمارت فون .. زى مثلا محتاج أنقل الأسماء والرسايل والصور من موبايلى القديم ( نوكيا 6120 ) وزى لو للكاميرا ظبط يكون إزاى , وإزاى أقدر ألغى صوت الكاميرا أثناء التصوير , وبالنسبة للفلاش إزاى اقدر أشغل حاجات أو ألعاب فيها فلاش على الجهاز ( زى مثلا لعبة المزرعة السعيدة على الفيس بوك ) وهل فى برامج أقدر أعمل بيها داونلود لفيديوهات وحاجات صوت ؟
أسف جدا على الإطالة , وشكرا جزيلا .

el3adawi

2013-06-09 (10:47:59PM)

هو احسن ولا htc cha cha?

besso777

2013-06-10 (01:31:24AM)

اولا الف مبروك على الموبايل وربنا يباركلك فى يارب يا استاذ aliafify وبالنسبه لبرنامج الفلاش هتحمله من الموقع ده وهتسطبه على الموبايل هيشتغل على طول

وبالنسبه لتحميل الفبديوهات فى برنامج فى جوجل استور اسمه youtube downloader تقدر تحمل اى فيديو من عليه واى استفسار تانى انا موجود

AliAfify

2013-06-10 (02:14:25AM)

متشكر جدا يا أستاذ سامى ( besso777 )
يا ريت لو مش هيضايق حضرتك ممكن نتواصل على الموبايل لسهولة وسرعة الإستفسار

AliAfify

2013-06-10 (08:00:20PM)

شكرا يا باشا .. حملت الفلاش ده بعد طلوع روح وصطبته ووبدأت تظهر الإعلانات اللى على الموقع هنا , وبعديها بشوية لما قفلت الصفحة وفتحتها تانى لقيته بيقوللى رسالة ان محتوى الصفحة دى عايز اصدار احدث من ادوبى فلاش بلاير , والحاجات اللى فيها فلاش او المزرعة السعيدة على الفيس بوك مش بتظهر اصلا !!

تلك الخدمة مخصصة للأعضاء فقط